Inaciu Iglesias anuncia’l fin de la edición en papel de Les Noticies

LES NOTICIES. INACIU IGLESIAS.

Una decisión difícil
Son tiempos duros pa tol mundu, vivimos en plena crisis y hai una llei non escrita que diz que’l periodista nunca tien que ser la noticia. Pero, vistes les circunstancies, van permitime que faiga una escepción. Depués de dieciséis años y 768 númberos nos quioscos, esti selmanariu, LES NOTICIES, va dexar d’editase en papel. Efectivamente, el periódicu que tien nes manes, como consecuencia d’una decisión bien mala de tomar, va ser el penúltimu exemplar d’una aventura qu’empezó a mediaos del añu 1996. La selmana qu’entra vamos editar el númberu 769 y con ello vamos ciarrar un ciclu que fomos a abrir hai década y media, cargaos d’ilusión, de la que saquemos a la cai’l númberu cero.
Abúltame que nestos dieciséis años pasaos tuviemos que recorrer sieglu y mediu. Tuviemos qu’aprender trabayando, teorizar practicando y crear onde nun había. Pero fixímoslo. Inventemos un productu singular –un selmanariu xeneralista n’asturianu– que, en realidá, yera más propiu del sieglu XIX que d’anguaño. Con too y con eso, y seique porque veníemos a cubrir un vaciu históricu qu’arrastrábemos como asturianos dende diba doscientos años, la xente acoyó la nuestra iniciativa con entusiasmu. El primer retu taba consiguíu. Depués, colos años, evolucionemos aquel selmanariu decimonónicu nun periódicu más modernu, con más opinión y reportaxes de fondu: yera una fórmula cuasi más propia de los años trenta que de los noventa. Y avancemos. Y, col cambiu de década, siguiemos incorporando color y más dinamismu nos escritos y fiximos por asemeyanos a la prensa del sieglu XXI. Igual por eso, cuando festexemos los diez años d’existencia, yéremos bien conscientes de que se llograra lo más importante: enseñar a tol mundu que podíemos facelo, que podíemos facer periodismu y comunicación, y que podíemos facelo nel nuestru idioma, ensin etiquetes. Y, desque demostrao esto, el retu siguió siendo adaptase: enanchar el campu a lo audiovisual, enanchar productos y servicios, y incorporase al mundu dixital pa nun perder el tren. Agora, echando la vista atrás, cuento que fiximos los deberes y que, en poques palabres, diemos a la sociedá asturiana tanto como recibiemos d’ella. Ello ye, muncho.
Cometiemos errores –yo’l primeru, y bien d’ellos–, pero tamién tuviemos aciertos y van permitime que-yos diga que sigo convencíu de que’l balance ye, con uno y con otro, enforma positivu. Hai dieciséis años pensemos, y siguimos faciéndolo agora, que la información y la comunicación son fundamentales pal desarrollu del nuestru idioma; pal nuestru desarrollu como pueblu y como país. Y ye verdá que’l futuru acolúmbrase inciertu pero, precisamente por eso, vamos siguir apostando pola palabra, vamos siguir ameyorando la nuestra edición dixital –na que vamos siguir viéndonos– y vamos reforciar les nuestres producciones audiovisuales, coles qu’esplorar víes nueves.
Son tiempos duros pero, faciendo alcordanza, nun tengo otro qu’una sensación sincera d’arguyu y agradecimientu a tolos que fixeron posible esta aventura irrepetible: a los proveedores y empreses que nos acompañaron dende siempre, a los anunciantes y a les instituciones qu’apostaron por nós, a los llectores y soscriptores que siempre foron la nuestra razón de ser, a los entrevistaos y collaboradores que tanto nos aportaron, y, sobre manera, a los compañeros y profesionales que, a lo llargo d’estos años y nes distintes etapes qu’atravesemos como mediu, dieron lo meyor d’ellos mesmos pa tresformar en realidá’l suañu d’unos editores.
Pensando en toos ellos, la selmana qu’entra vamos facer por despidir esti periódicu en papel como merez y vamos siguir viéndonos tantu tiempu como ustedes quieran en LESNOTICIES.COM.
Por too ello, munches gracies.